الكسكس المغربي

طريقتي فطياب الكسكس.

انا كنطيب الحمص فطنجرة وحدو ومرق الخضرة ديال الكسكس بحدها. 

1_نخدو كوكوط نديرو فيها قطعة دجاج أولحم داك شي اختياري  نزيدو عليها البصل +زيت ،الملح ،زعفران، خرقوم ونصف كاس ماء ونخليو اللحم يتقلى ،نزيدو العطرية بزار+سكين جبير+قبطة ديال القزبر ومعدنوس+شوية قرفة +الحمص او ندروه يطيب.

2_  دبا نطيبو المرق ديال الكسكس   نخدو طنجرة او كوكوط نديرو اللحم ديالنا يتقلا او دجاج مع البصل +ملح +خرقوم منين يتقلا نزيدو العطرية ديالنا بزار+سكين جبير+شوية ديال السمن و نمرقو بالماء.نخليو اللحم يطيب نصف طياب ثم  نبداو نضيفو الخضر حسب كل خضرة شحال تاخد ديال الطياب .انا كندير اللفت المرّة هي الاولى تطيب شوية عاد نزيد خيزو +كرعة الخضراء اللفت  البيضة +الكرعة الحمراء ،متنساوش تضيفو ملعقة صغيرة من مطيشة الحكّ 

بالنسبة للكرمب او الملفوف انا طنطيبو وحدو،كناخذ شوية من المرق ونطيبو فيه باش يبقى محافظ على الشكل ديالو وميتخلطش مع باقي الخضر

ملاحضة:لي معندهاش السمن تستعمل ضامة ديال السمن من بعد مايدير كلَ الخضر.  

 دبا نمشيو نفورو كسكسو انا كندير الكسكس فالقصعة نزيد عليه شوية الزيت والملح نبسّه شوية بيديا ثم نزيد عليه الماء طايب و نغطيه،نخليه شوية نلقاه شرب داك الماء لي درتو كيرجع بحال الى تفور 1تفويرة ،دريه فالكسكاس يتفور،مين تشوفيه طلعات معاه التفويرة زوليه من الكسكاس ورشيه بالماء يكون عادي ديال الرُبيني غطيه وخليه حتى يشرب دريه يتفور. كتعاودي نفس الطريقة 2ديال المرات.

مين تبغي تقدميه دهني السكسو غي بشويييية ديال الزبدة غي شوية .نزليه فطبق التقديم.ديري الخضر فالجناب وشوية الحمص فالوسط وديري فوقه اللحم وزيدي شوية حمص من الفوق ثم مرقي .وبالصحة والراحة.